الإمام البخاري ومحمد صلاح والملك فاروق

 واحد سألني بيقول البخاري اكيد كان بياخد وقت كبير في فرز الاحاديث ايه الصحيح فيها وايه الضعيف فازاي قدر يعمل كل الاحاديث اللي بيقول انه كان حافظها دي كلها قولتله ابوتريكة جاب ٢٥ جول للزمالك في كاس مصر الكلام ده صح ولا غلط 

قالي طبعا غلط ابوتريكة كان بيلعب في الاهلي وعمره ما لعب للزمالك ..قولتله اديك حكمت علي الجملة انها ضعيفة في اقل من ٥ ثوان .. 🙂

خد دي كمان ..صلاح لما سجل جول الوصول لكاس العالم قابله الملك فاروق وكرمه واداله كيس شيبسي بالجبنة هدية 😀

قالي الملك فاروق مات قبل صلاح ما يتولد اصلا ..

 قولتله اديك حكمت لتاني مرة ان الجملة مكذوبة وفي ثانية واحدة بس .. 

رواة الاحاديث زمان اغلبهم كانوا مشهورين زي لاعيبة الكورة عندنا دلوقتي بالنسبة لعلماء الحديث وخصوصا في عصر البخاري اللي ظهر فيه اغلب اصحاب كتب الحديث زي الترمذي ومسلم والنسائي وغيرهم .. القصة انك تعرف الاسماء اللي بتتكرر في سند الاحاديث الاول وبعد كده في ثواني هتكتشف الحديث ده صحيح ولا ضعيف من معرفتك لاسماء الناس اللي في السند زي ما انت عرفت ابوتريكة وصلاح والملك فاروق كده وزي لما اجيبلك اسم جرنال او اعلامي معروف عنه انه بيقول اخبار مفبركة اول ما هتسمع اسمه في السند هتحط الحديث في خانة الضعيف علي طول من غير تفكير او مجهود 

البخاري اصلا وهو عنده ١٨ سنة كان مؤلّف كتاب في علم الرجال وعارف الشخصيات اللي بتروي الاحاديث قبل ما يبدأ في تجميع كتاب الصحيح 

قالي طب ازاي البخاري جمع كل الاحاديث دي في وقت صغير كده اكيد كانت محتاجة وقت طويل جدا عشان يجمعها اصلا ده بيقول انه جمعها من ٦٠٠ الف حديث ..  قولتله انت ابنك بيروح المدرسة الساعة كام قالي بيبدأ الطابور ٧ ونص وبيخلص المدرسة بيكمل دروس بعدها غالبا لحد خمسة وبيرجع .. قولتله دول كده ٩ ساعات ونص .. انت عندك التسجيل المرتل لسورة البقرة لمشاري مدته ساعتين ودي سورة قربت علي ال٣٠٠ آية واياتها اطول آيات في القران .. اغلب الاحاديث في نفس طول الايات دي واحيانا اقصر كمان .. طبعا انت بتسأل دلوقتي وايه علاقة ده بموضوعنا

 كان زمان - ولسه موجود لحد دلوقتي -  حاجة اسمها جلسات استماع حديث تقعد كده الشيخ يفضل يقول احاديث وبس .. حديث ورا حديث زي اللي بيقرا قران كده والطلبة بتكتب وراه ..او مجرد بتسمع .. بحسبة بسيطة ابنك لو بيسمع قران بس في كل الحصص يقدر يسمع في حدود ١٥٠٠ اية في اليوم لو حسبنا علي سورة البقرة  .. اغلب الختمات المرتلة للقران كامل اصلا طولها في حدود ٢٠ - ٢٥ ساعة يعني ابنك ممكن يسمع القران كله اللي هو اكتر من ٦ الاف اية في يومين ونص بس .. 

لو استبدلت الحديث مكان الاية وحتي لو حسبتها علي ايات سورة البقرة الطويلة هتلاقي استماع الف و١٥٠٠ حديث في اليوم ممكن جدا وسهل حدوثه .. شوف بقي في السنة تقدر تجمع كام حديث

 البخاري مكانش بيروح يلف علي البيوت بيت بيت ويروح يجمع احاديث .. كان في ناس قبله اصلا مجمعه احاديث وبتعمل مجالس لتلاوة الحديث وهو كان بيسافر يروح للناس دي .. 

يعني واحد مجمع كل الاحاديث من محدثين القاهرة الكبري هو بيروحله هو بس ياخد الاحاديث اللي عنده اللي هم ٢٠ الف حديث مثلا يسمعهم في شهر بالكتير وبعدين يروح لاتنين تلاتة مجمعين الاحاديث من رواة الصعيد وهكذا ..

 المحدثين دول كانوا بيجمعوا كل الاحاديث اللي يقدروا عليها سواء من منطقتهم او كانوا بيسافروا هم كمان زي البخاري وده كان بيوفر مجهود علي اللي جاي بعدهم وبيدي قوة اكبر للحديث لما يكون اتروي بنفس النص من شخصين مختلفين مثلا او اكتر وفي اكتر من بلد وده اللي اسمه التواتر ..

 البخاري مش هو اول واحد جمع احاديث لكنه هو اللي اشترط في الكتاب بتاعه جمع الاحاديث الصحيحة بس ..فهو كمل علي مجهود اللي قبليه ومبدأش من الصفر .. الامام مالك والامام احمد وغيرهم كتير كانوا عاملين كتب في الحديث قبليه 

قالي طب هو حفظ كل الاحاديث دي ازاي وامتي قولتله هو انت ابنك مش لما بيرجع من المدرسة بيذاكر برده قالي ايوه قولتله البخاري هو كمان كان بيذاكر لما بيرجع 

واحنا مش بنتكلم علي اي حد وخلاص احنا بنتكلم علي الفلتة والعبقري بتاع الزمن بتاعه يعني زي زويل كده بالنسبالنا ولا ذاكر نايك مثلا .. واحد عنده قوة ذاكرة نادرة مش حد عادي  وبيحب المجال ده وداخل فيه بمزاجه ومكرس حياته كلها ليه 

ده غير انه قال انه جمّع الاحاديث دي كلها في ١٦ سنة واحنا قولنا ان استماع الف حديث في اليوم شيء ممكن وعادي واعرف ناس عملته اصلا في العصر بتاعنا .. يعني ال٦٠٠ الف حديث ممكن يتسمعوا في سنتين بس وال١٤ سنة التانيين اعتبر انه قعد يحفظ فيهم .. قشطة كده ؟ 😀

هتقولي كان بيسافر برده عشان يجمع الاحاديث وده اكيد كان بيضيع وقت .. هقولك كان بيحفظ ويراجع وهو بيسافر برده مكانش مقضيها فيس وواتس طول الوقت اكيد 🙂

مع اضافة معلومة مهمة ان نفس الحديث ( المتن ) لو اتروي بسندين تلاتة مختلفين كانوا بيعتبروهم ٣ احاديث مش حديث واحد حتي لو في اسم واحد بس مختلف في السند عن السند التاني 

ولو في ٥ اسماء بين الراوي وبين الرسول اوقات كتير اقرب ٣ اسماء للرسول كانوا بيتكرروا بالنص في كذا حديث فده كان بيسهل الحفظ اكتر علي الدماغ 

 زي مثلا لو انت بتحفظ اجوال المنتخب جات ازاي وتلاقي ثابت في الاول الحضري بيباصي لحجازي بيديها للنني لعبد الله السعيد وصلاح وجول ..كل مرة النني وعبد الله السعيد وصلاح وجول .. شيء ثابت في اغلب الاجوال .. فأنت بتحفظ اول اسمين بس والباقي خلاص معروف ..  وده بيسهل عليك الحفظ اكيد  

للناس اللي مش فاهمة : متن الحديث = نص الحديث نفسه .. سند الحديث يعني الاسماء اللي روت الحديث ( عن فلان عن فلان وهكذا لحد ما توصل للرسول عليه الصلاة والسلام ) ..

محدش يضحك عليك في موضوع البخاري تاني بقي :)

- أحمد حسن كاسب