حقا صدق من قال لا تسمع من طرف واحد.... اعتدت منذ ان كنت طفلا ان اسمع ان الاخ الاصغر فى العائلة الفلانية اخ ندل و يتهرب من اشقاؤه الفقراء.... كنت اغيب اغيب عدة سنوات ثم قدرا يتم فتح الموضوع امامى من احد معارفي عن الاخ الاصغر فى العائلة الفلانية الندل البخيل الذى يتنكر لعائلته الفقيرة بل انه حتى لم يعرف احدا من اهله سكنه و خاصة شقيقه الاكبر الفقير و الذى رغم فقره فهو كريم ببذخ و معظم اهل الحى يحبوه لانه معروف انه كريم و بلغة اهل مصر اللى في ايده مش له... رغم انه فقير... و انا على هذا الحال منذ اربعين سنة تقريبا اسمع ان العائلة الفلانية هذه فيها اخ ثرى و رغم ذلك بيتهرب من عائلته الفقيرة لانه بخيل و ندل... المهم اضمرت فى نفسي منذ عدة سنوات ان اوبخ هذا الشقيق الاصغر الثرى اذا التقيت به قدرا رغم ان سنه تجاوز السبعين سنة الان تقريبا و لكننى اسمع ان صحته قوية و مش باين عليه سنه... طبعا ساوبخه بالادب ... مع احترامى لفارق السن بيننا
و سبحان الله فى صلاة عيد الفطر الماضية دخلت احد المساجد لاصلى العيد و اذا بهذا الشقيق الاصغر الثرى الندل امامى... قلت فى نفسي والله العظيم لن اتركك لازم الكلمتين اللى جوايا هقولهم لك.... طبعا السنين غيرته تماما لكن انا حافظ شكله لانى كنت اراه كل عشر سنين مرة على الاقل.. مرة اراه فى فرح مرة اراه فى عزاء، المهم انتهت الصلاة و ذهبت اليه و صافحته و ذكرته باننى ابن المرحوم باذن الله مدحت ذهنى و طبعا رحب بي لانه كان يعرف ابي جيدا ... و بعد عبارات الترحيب قلت له بلوم و بخجل بالله عليك يا حاج فلان لا تنسى شقيقك الاكبر و اخذت احنن قلبه عليه و اصف له حالته المادية الصعبة و هو مستمر فى ابتسامة خفيفة تخفى بعض الحزن حتى انتهيت من كلامى ثم قال لى خلصت كلامك خلاص و لا فيه حاجه تانى عاوز تقولها فقلت له لا خلصت كلامى خلاص... فقالى شوف يا محمد انا من حقى اقولك مالكش دعوة و ان ده موضوع عائلى لكن لان انت الشخص رقم عشرة تقريبا اللى يكلمنى في نفس الموضوع اذن انا سيرتى متشوهة عند اهل منطقتى و كده يبقى لازم اتكلم
اول نقطة يا محمد شقيقي الاكبر ده مش فقير زى ما انتم فاكرين ولا بيشحت ولا هو كريم رغم فقره و اللى في ايده مش له زى ما كلكم فاكرين
الحاجات اللى بيوزعها على الغلابة دى انا بابعت كل سنة صدقات و امانات له عن طريق قريب لينا و دى حاجه لله و مش عايز حد يعرف ان انا اللى بابعتها و هو الموضوع جه على هواه و عاش دور اللى في ايده مش له... ماشي الحال.. المهم الامانات توصل لاصحابها لانى باتحرى و بسال و هو عارف انه لو ماوصلش الامانة هشوف حد غيره و دى طعنة له لانه عود الناس انه كريم و جدع
انا عن طريق واسطة بيننا باقوله اعطى فلان كذا و اعطى فلان كذا طبعا هتقولى ليه ما بتشوفوش هقولك لانى مش عايز اشوفه لاسباب اولا اخويا ده بالذات انا تاكدت انه بيتمنالى الموت عشان يورثنى لانى ما باخلفش
ثانيا هنوصل انا وانت لغاية عربيتى مركونة هناك اهه هوريك اخر جواب للبنك وصل لاخويا الفقير و اختى استلمته و خباته و اعطته لى.... قلت له لا خلاص مصدقك فاقسم لازم يورينى الجواب و راح لعربيته فتحها و طلع جواب حساب بنكى بتاريخ حديث باسم اخوه و اذا برقم يقترب من السبعمائة الف جنيه
فقالى كل اللى انا قلته مش مهم انا راضي بانه يخبي فلوسه و يدعى الفقر
و راضي بانه بيتمنى لى الموت عشان يورثنى
لكن هقولك مختصر الحكاية باختصار
بص يا محمد اخويا ده طول عمره بتاع حريم و بيتجوز كثير عارف كده ولا لا
قلت له اه عارف... و كنت مستغرب انه فقير و اتجوز اربع مرات تقريبا كل عشر سنين بيتجوز و يطلق
قالى تمام
اخويا ده من وانا طفل دايما باصص لحاجتى. . يعنى لما كبرت بقى جسمنا قريب لبعض فكان دايما ياخد لبسي بل احيانا كان بباخد لبسي يعطيه لاصحابه و اصحابه يقولوا يا سلام على الكرم يا سلام على العطاء شوف فقير، و مش لاقى ياكل و كله كرم
بص يا محمد لبسي و اكلى اللى امى كانت بتشيله ليا اللى هو بنسميه مناب فلان كان بياكل منابي
خطيبتى ايام ما كنت عندكم فى الحتة كان بيبصلها رغم انه كان على ذمته زوجة
ما كانش مهنينى على حاجه
و اخيرا لما ابونا مات سابلنا حتة ارض فى البحيرة وقت ما بعناها و قسمنا فلوسها علينا كل واحد مننا طلع له بخمسين الف جنيه و البنتين كل واحدة بحوالى خمسة و عشرين الف تقريبا
قلت له متعجبا ارض
فقالى اه
ما ابويا الله يرحمه كان زى اخويا كده بيدعى الفقر و لبسه مبهدل بس عنده ارض
المهم لما اخدت ورثي اخويا كان هيتجنن عاوز ياخذ ورثي عشان يفتح شركة و نبقى شركاء و انا عشان هو اكلتى ما رضيتش اشاركه و مش بس كده سيبت له البيت و مشيت هو اخواتى البنات
و روحت سكنت برة و سافرت امريكا و اشتغلت و بقيت غنى والحمد لله و هو اخد فلوس البنتين و دخل معاهم شراكة فى شراء ارض فى منطقة فيصل و بنوا الارض بيت ثلاث ادوار كان ايامها فى الثمانينات الارض رخيصة والله اعلم كملوا فلوس البناء منين....... المهم انهم من قريب جدا باعوا البيت و محلين تحت البيت و راح حط فلوسه اللى وريتك الجواب بتاعها فى البنك و اعطى الاختين حقهم خوفا من اجوازهم و عيالهم
و اختى لما بتقعد عنده احيانا بييجى البوسطجى فاخدت الجواب ده و خباته عشان تثبتلى انه معاه فلوس
لانه عمال يبعتلى مراسيل عشان عاوز منى فلوس
هو فاكر انى مش عارف اخباره و حتى لو انا عارف ان معاه فلوس فمش هاكسفه
عشان كده قررت اختفى عن اخويا ده بالذات و قلت للبنتين او الاختين ماتعرفهوش اننا بنتصل ببعض ولا تعطوه رقمى
والله العظيم يابنى ساعات باحس انه ممكن يدبر لى موتة مش لانه بيكرهنى
لا
اخويا بيحبنى جدا جدا جدا جدا فوق ما تتخيل
بس هو بيعبد الفلوس عبادة
و هيتجنن عاوز يعرف املاكى فين و ايه و مش عارف يوصل لاى معلومات لانى مش باعرف حد حاجه عنى ولو هو تاكد انى ثرى فعلا و انى مش كاتب املاكى باسم حد فممكن جدا يحاول يدبر لى اى موتة عشان يورثنى
و باكرر عليك هو بيحبنى جدا بس بيعبد الفلوس عبادة
فهمت القصة يا عم محمد ولا لسة عاوز تسال على. حاجه؟؟!
انتهى. الموضوع
هناك اشياء اخرى لم أذكرها
تعليقات
إرسال تعليق