( ولا يحيق المكر السيء إلا بأهله) در مع الكرامة حيث دارت

من حوالى سنه ربنا ابتلانا برئيس قسم في المكان اللي انا شغال فيه بيسرق الحالات (بمعنى إنه بيمر ع  الحالات اللي المفروض تعمل عملياتها مجانا في المستشفى الحكومي ويقولهم  لو عملتوا عمليتكم هنا هتبوظ وممكن رجليكم او ايديكم تتقطع والاحسن لكم انكم تيجوا تعملوها عندي في الخاص) بالفلوس طبعا

وللأسف ناس كتير كانت بتصدق وتسيب المستشفى وتروحله

- كل الأخصائيين والاستشاريين اللي فى القسم اشتكوه لكن للأسف عشان كان مسنود شويه مكنش بيحصله حاجه

-في اليوم اللي كنت ببقي نباطشى فيه كنت بعدى ع الحالات بعد ما يمر عليها ويقولها الكلام بتاعه ده واحاول اقنع الناس انهم يستنوا في المستشفي وأن عملياتهم هتتعمل وهتبقي كويسه إن شاء الله وكنت بكلم أخصائي اليوم بتاعي (واللي هو للأسف برضه ملتحي) ولو فيه حاله طوارئ كنا بنشتغلها في نفس اليوم وبفضل الله كانت بتبقي نتايج العمليات احسن ما يكون

ولما السيد رئيس القسم عرف اني بعمل كده عمل معايا كذا مشكله انتهت بإنى لقيته مره بيتصل بيا ويقولى

 "حازم لو سمحت مشوفكش عندى في قسم العظام تانى"

-وع الرغم ان ده مش من حقه

إلا اني قولتله عادي ياريس ولا يهمك

ومكنش قدامي غير حل من اتنين :

-يا إما إني اتحايل عليه أو اكلم حد من الأخصائيين الكبار يتحايل عليه عشان ارجع مكاني تانى

(وده طبعا مكنش اوبشن ابدا بالنسبالى) 

-أو إنى اسيب المكان واسيب حقى وامشى بهدوء وادور ع مكان تانى اتعلم فيه

طبعا لو استشرت أي حد من البشر كان هيقولى الاختيار الأول هو الصح ومشى امورك عادي عشان تعرف تتعلم أو لو هتمشي مشي بهدوء عشان ميحصلكش مشاكل 

لكنى قررت إنى مستشيرش حد من البشر قررت إنى استخير ربنا سبحانه وتعالي

وع الرغم ان الموضوع عدي عليه اكتر من شهرين دلوقتي الا اني لسه فاكر ركعتى الاستخارة دول والله كانهم  لسه امبارح

فاكر ازاي كنت مسلِّم فيهم امري لربنا تماما

"يارب انا عارف لو استشرت الناس هيقولولي ايه بس انا مستشرتهمش وأتيت إلى جلالك أستشيرك فاهدني الي الخير ياحكيم ياعليم"

خلصت الركعتين وقررت اني طالما كده كده هسيب المكان يبقى لازم افضح الراجل ده قبل ما امشي

يمكن اكون سبب في ان ربنا يكفي الناس شره وسرقته فيهم

وبالفعل كان فيه جروب واتس عليه كل دكاتره المسشتفي دخلت عليه وبينت فيه" بكل أدب وبدون تفاصيل والله"ان رئيس القسم ده سبب فساد قسم العظام وهو اللي مسوء سمعه المستشفى

- تخيل بقى عزيزى القارئ يكون ايه رد فعل السيد رئيس القسم؟!! 

أو متحاولش تتخيل لأنك مهما تتخيل اكيد مش هتوصل للي هو عمله

                *الراجل اشتكاني في الأمن الوطنى 😂😅*

وكان نص الشكوى بتاعته إن عشان أنا  

والاخصائي بتاع اليوم اللي ببقي فيه(واللي عمره ما اتأخر عن عمليات الطوارئ في يومه) احنا الاتنين ملتحيين 

فاحنا بنعطل تعليمات سيادة الرئيس فى القضاء ع قوائم الانتظار وخدمه المرضى لأغراض سياسيه) 

اه والله يامؤمن زي مابقولك كده

- كنت أقرأ قبلها حديث سيدى رسول الله-صلى الله عليه وسلم- عن صفات المنافق أنه "إذا خاصم فجر" 

لكنى ما تخيلت قط 

أن أجد فُجرا فى حياتى هكذا 

كنت متخيل الموضوع في الأول هزار او مجرد تهديد 

إذ لا يمكن ان يفعل طبيب في زميله هكذا مهما حصل 

لكن للأسف اتأكدت انه عمل كده فعلا 

وكان الرجل لا يتحرج من فعلته بل بالعكس كان بيقول للناس انه عمل كده فعلا عشان يخوف النواب الصغيرين (اللي هو لو مسمعتوش كلامي هيبقي مصيركم زي مصير صاحبكم)

قعدت اكتر من شهر محضرش في قسم العظم 

وكان التمريض والعمال يقابلونى يقعدوا يدعولي ويقولولي ربنا ينجيك من كل سوء وميحكمش فيك حاكم ظالم 

اسوء شعور انك تحس بالشفقه في عيون الناس

ومبقتش عارف اعمل ايه

في الفتره دي كنت براجع سورة النمل 

كنت لما أوصل لقول الله تعالي 

" أمن يجيب المضطر إذا دعاه ويكشف السوء ويجعلكم خلفاء الأرض ءأله مع الله؟!!" 

مكنتش بقدر أكمل السوره والله وكنت اقعد أقول لا إله إلا الله.. لا إله إلا الله

كنت افتكر الركعتين بتوع صلاة الاستخاره واطمن نفسى وأقول هذه مشوره الرب وربى لن يضيعنى واقعد اقول لا إله إلا الله ومعرغش ادعى بحاجه تانيه

كنت اقرأ قول الله تعالى في نفس السوره 

"ومكروا مكرا ومكرنا مكرا وهم لا يشعرون فأنظُر كيف كان عاقبة مكرهم" 

فأقول في نفسى لا إله إلا الله اللهم أرني عاقبة مكره

فإذا بربى سبحانه وتعالى وعز وجل 

يسخر لي رجالا من المستشفى ع علاقه بظابط الأمن الوطنى اللي في المنطقه لما عرفوا الموضوع راحوله بدون ما اطلب منهم والله

وفهموه الموضوع كله وعرفوه إن رئيس القسم ده مشهور إنه بيسرق الحالات لعيادته الخاصه وإن الشكوى دي كيديه بدليل انه مشتكنيش غير بعد الكلام اللي كتبته ع جروب الواتس و وروه الكلام اللي كنت كاتبه ع الواتس قبل الشكوي بيوم

ولما ظابط الأمن الوطني عرف القصه وشاف الكلام بدل ما يستدعينى أنا استدعى السيد رئيس القسم 

وقاله عيب لما تعمل شكوى كيديه زي دي في زملاتك 

وان دي مشاكل داخليه في قسمك المفروض انت اللي تحلها احنا مش فاضيين للمشاكل الصغيره دي 

- وع الرغم إن كل الاخصائيين والاستشاريين المحترمين اللي في القسم كانوا بيشتكوا رئيس القسم بسبب سرقته للحالات طول السنه اللي هو مسكها ومحدش كان بيسمع منهم 

لكن لما الموضوع وصل للأمن القومى (بسبب الشكوي هو اللي هو بنفسه اشتكاها) سبحان الملك

الموضوع كبر جدا جدا ووصل للمحافظ 

وبالفعل المحافظ بعت وكيل الوزاره ونائب المحافظ ومدير إدارة المستشفيات للمستشفى عندنا عشان يعرفوا ايه اللي بيحصل في القسم بالظبط؟ 

وبالفعل عملولنا اجتماع حضر فيه كل الاخصائيين والاستشاريين تقريبا ومعظم النواب الصغيرين في وجود السيد رئيس القسم طبعا 

والناس بقوا مخضوضين لما سمعوا بشكل مباشر كل البلاوي والسرقه اللي كانت بتحصل

وفي الاخر سألونا في حضور رئيس القسم 

مين اللي عاوزه يستمر في منصبه؟ 

محدش رفع ايده 

قالوا طيب هنسألكم السؤال بصيغه تانيه

مين فيكم اللي عاوز رئيس القسم ده يتشال من منصبه ؟

كل الناس رفعت ايديها  في مشهد مهيب جليل انتصر فيه الحق وزهق الباطل إن الباطل كان زهوقا 

واتشال أخينا رئيس القسم من منصبه في نفس اليوم

-وبفضل الله ربنا رجعني للقسم بتاعى عزيزا كما ينبغى لأهل المبادئ أن يعودوا أعزه 

وخرج هو من منصبه ذليلا كما ينبغى لأهل المكر أن يكونوا أذله 

*اكتب هذا الكلام ليعلم الناس أن لهذا الكون رب يدبر أمره 

وأن الناس كل الناس لو اجتمعوا ع أن يضروك بشئ فلن يضروك إلا بشئ قد كتبه الله عليك 

وأن العاقبة للحق منصورا وإن بدا مهزوما في بعض الأحايين

 

كنت اتعجب من قول النبى - ص- خير ما قلته وقاله النبيون من قبلى "لا إله إلا الله" 

اليوم اعلم أن خير الكلام أجمع "لا إله إلا الله" 

وأنه لا مجيب للمضطر ولا كاشف للضر أحدٌ مثل الله 

وأنه لا أحد يُشير عليك بما ينفعك مثل الله 

اكتب هذا الكلام حبا في سورة النمل التي كانت رفيقتي في تلك الفتره فلنعم الرفيق كانت 

الان اقرأ قول الله تعالي 

" ومكروا مكرا ومكرنا مكرا وهم لا يشعرون 

فانظر كيف كان عاقبة مكرهم"

فأشهد أن مكر الله هو المكر

وأنه لا يحيق المكر السئ إلا بأهله

اقرأ قوله تعالى

"أمن يجيب المضطر إذا دعاه ويكشف السوء ويجعلكم خلفاء الأرض

ءأله مع الله؟!" 

فأشهد يقينا من كل قلبى أنه

#لا_إله_إلا_الله